കേരളത്തിലെ കായിക രംഗത്തിന് പ്രത്യേകിച്ച് ക്രിക്കറ്റിന് പുത്തൻ ഉണർവേകി ആലപ്പുഴ സനാതന ധർമ്മ (എസ്.ഡി) കോളേജിൽ രാജ്യാന്തര നിലവാരത്തിലുള്ള സ്പോർട്സ് ഹബ്ബ് ഒരുങ്ങുന്നു. 50 കോടി രൂപയുടെ ബൃഹത്തായ പദ്ധതിക്കായി കേരള ക്രിക്കറ്റ് അസോസിയേഷനും (KCA) സനാതന ധർമ്മ വിദ്യാശാല മാനേജ്‌മെന്റും തമ്മിൽ 33 വർഷത്തേക്കുള്ള ലീവ് ആൻഡ് ലൈസൻസ് കരാറിൽ ഒപ്പുവെച്ചു.
ആലപ്പുഴ രംഗമണി ആൻഡ് കമ്പനി ഓഫീസ് കോംപ്ലക്സിൽ നടന്ന ചടങ്ങിൽ കെ.സി.എ പ്രസിഡന്റ് അഡ്വ. ശ്രീജിത്ത് വി. നായരുടെ അധ്യക്ഷതയിൽ കെ.സി.എ സെക്രട്ടറി വിനോദ് എസ്. കുമാറും എസ്.ഡി.വി പ്രസിഡന്റ് ആർ. കൃഷ്ണനും ധാരണാപത്രം കൈമാറി.
2009-ൽ ഇരുവിഭാഗവും ഒപ്പുവെച്ച 15 വർഷത്തെ കരാർ കാലാവധി 2024-ൽ അവസാനിച്ചിരുന്നു. എന്നാൽ ഇരുകൂട്ടരും തമ്മിലുള്ള മികച്ച സഹകരണം കണക്കിലെടുത്ത് ഗ്രൗണ്ട് 33 വർഷത്തേക്ക് കൂടി കെ.സി.എയ്ക്ക് വിട്ടുനൽകാൻ വിദ്യാശാല മാനേജ്‌മെന്റ് തീരുമാനിക്കുകയായിരുന്നു.
പഴയ കാന്റീൻ പ്രദേശം ഉൾപ്പെടെ 11 ഏക്കർ സ്ഥലത്താണ് പുതിയ മാസ്റ്റർ പ്ലാൻ പ്രകാരമുള്ള നിർമ്മാണ പ്രവർത്തനങ്ങൾ നടക്കുന്നത്. ഇതിനോടകം തന്നെ 13 കോടി രൂപ ചെലവഴിച്ച് അത്യാധുനിക ഫ്ലഡ്‌ലൈറ്റ് സംവിധാനം ഇവിടെ സജ്ജമാക്കിയിട്ടുണ്ട്.
പ്രധാന സൗകര്യങ്ങൾ:
അന്താരാഷ്ട്ര നിലവാരത്തിലുള്ള പവലിയനുകൾ & ബ്രോഡ്കാസ്റ്റിംഗ് സംവിധാനം.
ഇൻഡോർ പ്രാക്ടീസ് സെന്റർ, ആധുനിക ജിംനേഷ്യം, 15 ഔട്ട്‌ഡോർ പ്രാക്ടീസ് നെറ്റുകൾ.
ഓഫീസ് കെട്ടിടവും സ്റ്റാഫ് ക്വാർട്ടേഴ്‌സും.
ക്രിക്കറ്റിന് പുറമെ കോളേജിനും മറ്റ് കായിക താരങ്ങൾക്കുമായി ഒട്ടനവധി സൗകര്യങ്ങളാണ് കെ.സി.എ ഒരുക്കുന്നത്:
അത്‌ലറ്റിക് ട്രാക്ക്, ഫുട്ബോൾ ഗ്രൗണ്ട്, ഫുട്സൽ കോർട്ട്, ബാസ്‌ക്കറ്റ്‌ബോൾ കോർട്ട്, മിനി ക്രിക്കറ്റ് ഗ്രൗണ്ട്.
ആധുനിക കാന്റീൻ കെട്ടിടം.
ഈ സൗകര്യങ്ങളെല്ലാം ക്രിക്കറ്റ് അസോസിയേഷനും കോളേജിനും ഒരുപോലെ ഉപയോഗിക്കാൻ സാധിക്കും. സി.സി.ടി.വി ഉൾപ്പെടെയുള്ള സുരക്ഷാ സംവിധാനങ്ങളും പരിപാലനവും കെ.സി.എ തന്നെയാണ് വഹിക്കുന്നത്.
"33 വർഷത്തെ ദീർഘകാല കരാർ കേരള ക്രിക്കറ്റിന്റെ വളർച്ചയിൽ നിർണ്ണായക വഴിത്തിരിവാകും. പദ്ധതി പൂർത്തിയാകുന്നതോടെ എസ്.ഡി. കോളേജ് മൈതാനം സംസ്ഥാനത്തെ ഏറ്റവും മികച്ച കായിക കേന്ദ്രമായി മാറും." — അഡ്വ. ശ്രീജിത്ത് വി. നായർ (കെ.സി.എ പ്രസിഡന്റ്)
പുതിയ ഇൻഡോർ, പവലിയൻ സൗകര്യങ്ങൾ അതിവേഗം പൂർത്തിയാക്കി സംസ്ഥാനത്തെ യുവതാരങ്ങൾക്കായി മികച്ച പരിശീലന കളരി ഒരുക്കുകയാണ് ലക്ഷ്യമെന്ന് കെ.സി.എ സെക്രട്ടറി വിനോദ് എസ്. കുമാർ വ്യക്തമാക്കി.
ചടങ്ങിൽ എസ്.ഡി. കോളേജ് മാനേജർ പി. കൃഷ്ണകുമാർ, എസ്.ഡി.വി. സെക്രട്ടറി എൻ. നീലകണ്ഠൻ, ആലപ്പുഴ ജില്ലാ ക്രിക്കറ്റ് അസോസിയേഷൻ പ്രസിഡന്റ് യു. മനോജ്, സെക്രട്ടറി പി.ജെ. നവാസ് തുടങ്ങിയ പ്രമുഖർ പങ്കെടുത്തു.
ക്രൈസ്റ്റ്ചർച്ചിൽ ചരിത്ര ജയം; ന്യൂസിലൻഡിനെതിരെ ഇന്ത്യക്ക് തകർപ്പൻ വിജയം
ഇന്ത്യൻ ക്രിക്കറ്റിലെ 'കറുത്ത ഏടുകൾ'; ഗ്രെഗ് ചാപ്പലിനെതിരെ കടുത്ത വിമർശനവുമായി ഹർഭജൻ സിംഗ്!
പ്രഗ്യാൻ ഓജ ഇന്ത്യൻ പുരുഷ സെലക്ഷൻ കമ്മിറ്റി പുതിയ അധ്യക്ഷൻ
തിരക്കുപിടിച്ച ഷെഡ്യൂളും പരിശീലനക്കുറവും; വെല്ലുവിളികളെക്കുറിച്ച് തുറന്നുപറഞ്ഞ് സഞ്ജു സാംസൺ!
