ദേശീയ വനിതാ അണ്ടർ 19 ക്രിക്കറ്റ് ചാമ്പ്യൻഷിപ്പിൽ കേരളത്തിന് തിരിച്ചടി. രാജസ്ഥാനെതിരായ മത്സരത്തിൽ 50 റൺസിന്റെ തോൽവിയാണ് കേരളം ഏറ്റുവാങ്ങിയത്. സ്കോർ: രാജസ്ഥാൻ 20 ഓവറിൽ 135/1; കേരളം 18.3 ഓവറിൽ 85 ഓൾ ഔട്ട്.
ടോസ് നഷ്ടപ്പെട്ട് ആദ്യം ബാറ്റ് ചെയ്യാൻ ഇറങ്ങിയ രാജസ്ഥാന് മികച്ച തുടക്കമാണ് ഓപ്പണർമാർ നൽകിയത്. ഓപ്പണർ ധൃതി മാഥൂറിന്റെ തകർപ്പൻ ബാറ്റിംഗാണ് രാജസ്ഥാന് കരുത്തായത്. 66 പന്തുകളിൽ നിന്ന് 4 ഫോറുകളുടെയും 3 സിക്സറുകളുടെയും അകമ്പടിയോടെ 85 റൺസുമായി ധൃതി പുറത്താകാതെ നിന്നു. പ്രിയൻഷി ചൗധരി 31 റൺസ് നേടി മികച്ച പിന്തുണ നൽകി. അങ്ങനെ രാജസ്ഥാൻ നിശ്ചിത 20 ഓവറിൽ ഒരു വിക്കറ്റ് നഷ്ടത്തിൽ 135 റൺസിന്റെ ഭേദപ്പെട്ട സ്കോർ പടുത്തുയർത്തി.
136 റൺസ് വിജയലക്ഷ്യവുമായി ഇറങ്ങിയ കേരളത്തിന് തുടക്കം മുതൽ പിഴച്ചു. രാജസ്ഥാൻ ബൗളർമാരുടെ കൃത്യതയാർന്ന ആക്രമണത്തിന് മുന്നിൽ കേരള ബാറ്റിംഗ് നിര അടിപതറി. 18.3 ഓവറിൽ വെറും 85 റൺസിന് കേരളം എല്ലാവരും പുറത്താകുകയായിരുന്നു.
നിവേദ്യമോൾ (25) മാത്രമാണ് കേരള നിരയിൽ ഭേദപ്പെട്ട പ്രകടനം കാഴ്ചവെച്ചത്.
അമീറ ബീഗം (14), അനുഷ്ക സി.വി. (13), പാർവതി കുഞ്ഞുമോൻ (12) എന്നിവർ രണ്ടക്കം കണ്ടെങ്കിലും ടീമിനെ വിജയത്തിലേക്ക് നയിക്കാൻ അത് പോരായിരുന്നു.
രാജസ്ഥാൻ നിരയിൽ കൃത്യതയാർന്ന പന്തേറിലൂടെ നാല് വിക്കറ്റ് വീഴ്ത്തിയ നിഷിത സോതിയാണ് കേരളത്തിന്റെ ചിറകരിഞ്ഞത്.
ക്രൈസ്റ്റ്ചർച്ചിൽ ചരിത്ര ജയം; ന്യൂസിലൻഡിനെതിരെ ഇന്ത്യക്ക് തകർപ്പൻ വിജയം
ഇന്ത്യൻ ക്രിക്കറ്റിലെ 'കറുത്ത ഏടുകൾ'; ഗ്രെഗ് ചാപ്പലിനെതിരെ കടുത്ത വിമർശനവുമായി ഹർഭജൻ സിംഗ്!
പ്രഗ്യാൻ ഓജ ഇന്ത്യൻ പുരുഷ സെലക്ഷൻ കമ്മിറ്റി പുതിയ അധ്യക്ഷൻ
തിരക്കുപിടിച്ച ഷെഡ്യൂളും പരിശീലനക്കുറവും; വെല്ലുവിളികളെക്കുറിച്ച് തുറന്നുപറഞ്ഞ് സഞ്ജു സാംസൺ!
